Со Проектот за поддршка на човековите права годинава биле евидентирани 100 случаи кога полицијата брутално се однесувала над граѓаните и ги пречекорувала своите овластувања. Според координаторот на проектот Петар Јордановски, тие редовно поднесуваат претставки до Секторот за внатрешна контрола и професионални стандарди во МВР, до Народниот правобранител и Јавносто обвинителство, но соработката, вели тој е многу слаба.

Од поднесени 71 претставка во СВКПС било одговорено само на 47, а на 37 од нив било одговорено дека се неосновани и нема прекршување на човековите права. За три претставки биле казнети полицајци со намалување на плата, а ниеднаш не било разрешено службено лице. Во Јавното обвинителство резултатите се уште послаби. За повеќе од половина од случаите било кажано дека истрагата е во тек, а дел од тие случаи биле пријавени пред две години. Бил поднесен акт за два случаи, а за 6 Јавното обвинителство се откажало од истрага.

Нешто подобра соработка, според Јордановски постои со Народниот правобранител. Од поднесени 51 претставка било одговорено на 33, а биле испратени и неколку укажувања до МВР.  За разлика од минатата година бројот на граѓани кои се пожалиле на брутално однесување на полицијата е значително зголемен. Најолем број од наводните жртви се мажи, а од 122 евидентирани жртви, 52 се Македонци, 47 Албанци и 18 се Роми. Проектот е организиран од пет невладини организации, а финансиски поддржан од ОБСЕ (Б.З.) 

Извор: Вечер, 22.12.2005.
http://www.vecer.com.mk/tekst.asp?tid=21411